BALOZI ZENA AKUTANA NA GAVANA WA RIYADH, KUKUZA UHUSIANO WA TANZANIA NA SAUDI ARABIA

Balozi wa Jamhuri ya Muungano wa Tanzania nchini Saudi Arabia, Mheshimiwa Mha. Zena Ahmed Said, amekutana na kufanya mazungumzo na Gavana wa Jiji la Riyadh, Mwanamfalme Faisal bin Bandar bin Abdulaziz Al Saud, ofisini kwake jijini Riyadh. Ziara hiyo ililenga kujitambulisha na kuweka msingi imara katika utekelezaji wa majukumu yake ya kidiplomasia nchini humo.

Katika mazungumzo hayo, Balozi Zena alisisitiza kuwa Tanzania inathamini sana uhusiano wa kihistoria na ushirikiano uliopo kati ya nchi hizo mbili, huku akiahidi kuuenzi na kuuendeleza. Aidha, alitumia fursa hiyo kumwalika Mwanamfalme Faisal kutembelea Tanzania ili kujionea vivutio mbalimbali vya utalii.

Kwa upande wake, Mwanamfalme Faisal alieleza kufurahishwa kwake na viwango vya ushirikiano vilivyopo baina ya pande zote mbili. Alimpongeza Balozi Zena kwa hatua hiyo ya kumtembelea na kumtakia heri pamoja na mafanikio makubwa katika uwakilishi wake nchini Saudi Arabia.

Kukutana huku ni hatua muhimu katika mkakati wa kuimarisha diplomasia na kukuza fursa mpya za ushirikiano kati ya Tanzania na Saudi Arabia. Viongozi hao wawili waliahidi kuendelea kushirikiana kwa karibu ili kufikia malengo ya kiuchumi na kijamii kwa faida ya pande zote mbili.